Stichting Reclassering y Jeugdbescherming Aruba (SRJA) y Fundacion Salud Mental Aruba Respaldo (FSMA Respaldo) a firma un protocol di colaboracion riba 3 di november 2025 pa fortalece e trabou hunto pa e guia di clientenan cu problema tanto den area hudicial como mental.
E colaboracion a wordo formalmente firma door di Sra. Seraida Pemberton-Leonard, M.Ed, directora di SRJA, y Sra. mr. Caroline Hart, directora general di FSMA Respaldo.
Cu e protocol aki, e dos institucionnan ta formalisa nan colaboracion tocante intercambio di informacion, trayecto di tratamento y guia di cliente, cu aparte di e situacion hudicial, tin necesidad pa haya tratamento psikiatrico. E meta principal ta pa mehora continuidad di cuido, preveni recaida y facilita reintegracion social di e cliente den comunidad.
E colaboracion aki ta un momento importante den e desaroyo di cuido integral na Aruba. Door di uni conocemento y experiencia, clientenan cu problema compleho por haya un guia mas eficiente.
E protocol di colaboracion ta forma parti di un maneho mas amplio cu a wordo desaroya den oktober 2025. E maneho aki ta delinea con Stichting Reclassering y FSMA Respaldo ta traha hunto den area di diagnostico, tratamento, guia y evaluacion di cliente cu problema psikiatrico den sistema hudicial.