Tremendo trabou di polis y empleadonan di Voco Surfside, cu a bay un extra mile pa yuda un turista
L.G. Smith Boulevard, Oranjestad:
Diadomingo algo despues di mey anochi, un poco mas pabou di Surfside Beach, un of mas persona lo a mira un homber drumi abou tur na orina, mesora a bati alarma pa esaki.
Na e sitio polis a bin topa cu un turista masculino basta bou influencia di alcohol drumi abou y no por a ni cana mas. Tambe polis a bin saca afo cu e turista aki tabata kedando na Voco Surfside, Ex Talk of the Town Beach Hotel. E turista lo a sali dal un trip den Aruba su nightlife y lo a abusa un poco di mas di alcohol, e haltura di alcohol a dal e turista hopi duro, cu yegando su hotel, su luz lo a paga y a bay vloer.
E agentenan policial a dicidi cu no ta bay cu ne warda, pero nan a dune un lift cortico pa su hotel, pasobra e turista tabata bou influencia pero toch tabata basta cooperativo y trankil.
Na momento cu polis a yega Voco Surfside Aruba, e empleadonan amabel di e hotel aki, mesora a tuma e turista over, nan a yude y a hib’e te den su camber di hotel, pa e ta sano y salvo bek den camber. E experiencia di e anochi aki na Aruba, sigur pa e turista aki lo keda como un recuerdo bunita di nos hendenan na Aruba y especialmente na e hotel cu tin hende amabel y hospitalario ta traha.