No tin prueba concreto pa por bisa cu siguridad con e idioma a nace y na unda esaki a sosode. Pero for di e parti di historia di e colonisacion Spaño, tin informacion cu e hiba e indjannan di e islanan aki tur hunto pa Hispañiola na inicio di siglo 16 y aya nan a siña compronde y papia e idioma Spaño di e temponan ey, cu no tawata e Castellano conoci awe como e idioma Spaño. Alonso de Ojeda (El caballero de la Virgen), cu a yega e region aki y e islanan ABC na 1499 riba e di prome asina yama ‘Viahes menores o Andaluces’ di exploracion cu a sali for di Spaña. El a casa cu yiu di un Cacique di e region aki y a ser nombra gobernador di un parti di e region cu el e descubri. Despues di no a logra establece su mes como gobernador el a bolbe e isla Hispaniola unda el a muri sin por a finaliza e colonizacion cu el a inicia aki den nos region, cu a bolbe ser intenta e biaha aki for di e islanan ABC, pa medio di un Real Cedula decreta November 1525, den cual e Reynan Catolico di Spaña a duna e Spaño procediente di Hispaniola Juan Martinez de Ampies, e derecho pa repobla e tres islanan Oruba, Isla de los Gigantes y Buon Aire. Peter Stuyvesant nombra klerk pa e compania hulandes WIC prome na Brasil y despues na Corsou ta bira director di e tres islanan ABC y Nieuw Amsterdam (New York) den un nota di maart 1643 encontra den e documentonan di “Curacao Papers” ta menciona entre otro e Indjannan treci for di Aruba y Bonaire pa e isla di Corsou cu a aumenta nan cantidad pa mitar. Como Gobernador di Nieuw Amsterdam y “Curaçao”, el a manda 130 soldad Brasileño/’Hulandes’ y setenta civil pa Nieuw Amsterdam. Mientras cu como director general di Nieuw Nederland y e islanan ABC el a manda algun indjannan prisonero como esclavo pa e islanan aki. Tin e informacion tambe cu pa a comunica cu e indjannan despues bou di e colonizacion hulandes, tawatin mester di padernan di habla spaño. Tin texto cu ta duna indicacion cu Papiamento mester tabata existi ya caba for di mucho prome cu cuminsamento di siglo 18 na Corsou y for di final di e siglo ey na Aruba. E texto mas bieu cu nos tin na Papiamento ta un carta di aña 1775 di un Hudiu na Corsou, cu lo por a bin aki for di tempo di Stuyvesant cu Hulanda a perde su colonianan na Brasil.
Na Aruba e documento mas bieu na Papiamento ta data for di aña 1803. Esaki tabata un declaracion legal cu 26 Indjan a firma pa sostene Commandeur Pieter Specht den un procedura den corte. Esaki kiermen cu Papiamento ta existi 250 pa 300 aña caba sigur. Sinembargo, mayoria di e autornan cu a skirbi tocante origen di Papiamento ta pensa cu Papiamento, of por lo menos e base di Papiamento, ta mas bieu ainda, ya for di e prome repoblacion na 1525 bou di Juan de Ampies y Bejarano, of ya for di tempo cu Ojeda a yega e region aki y casa akinan y Bartolome de las Casas a inicia un proyecto (utopico?) pa a forma un pueblo di famianan cunukeronan spanjo y indjan.
Tin diferente teoria tocante origen di Papiamento. Maske cu e diferente autornan cu a skirbi tocante origen di Papiamento tin nan propio variante di un of otro teoria, en general por dividi nan den dos grupo.
Un grupo di autor ta defende e teoria cu Papiamento, mescos cu mayoria di e otro idiomanan crioyo, a nace di un solo proto-crioyo Afro-Portugues cu tabata existi na costa west di Africa (e teoria monogenetico). E otro grupo, cu ta sostene e teoria poligenetico, ta contradeci esaki y ta bisa cu Papiamento a nace for di e necesidad di comunicacion entre e Spañonan y e Indjannan, despues cu e Spañonan a colonisa e islanan ABC rond di aña 1500. Entre e autornan cu ta defende e teoria Afro-Portugues tin Han van Wijk, Rodolfo Lenz y Frank Martinus Arion, cu a promove na 1997 riba e topico aki. Segun e teoria aki na costa west di Africa un lenga Afro-Portugues a desaroya, cu a keda funciona como idioma di contacto entre Europa y Africa pa negoshi di esclabo te den siglo 17. Ta for di e mesun costa west di Africa aki tabata transporta esclavo pa diferente parti di Caribe. A base di adopcion di palabra di e diferente idiomanan Europeo cu tabata domina den region di Caribe, e idioma di contacto aki a sigui desaroya te cu el a resulta den diferente idioma crioyo, manera esun di Jamaica a base di palabra Ingles, esun di Haiti a base di palabra Frances, etc. Pa Papiamento e teoria aki ta implica cu Papiamento a nace di un lenga Afro-Portugues cu despues a sigui desaroya a base di palabra Spaño/Portugues.
En cambio, segun e otro grupo di autor, di cual por menciona entre otro Antoine Maduro, Jose Pedro Rona y Jossy Mansur, Papiamento lo a desaroya for di un principio for di Spaño y lenga Indjan. Maduro, papiamentista Antiano, ta señala cu no necesariamente tur palabra cu ta parce Portugues tin un origen Portugues. E ta bisa cu por atribui hopi palabra na un di e dialectonan Spaño di siglo 16 cu tin un parecido na Portugues (manera p.e. Gallego). Segun Maduro, e poco palabranan cu sin duda tin un origen Portugues por ta procedente di e Hudiunan di habla Portugues cu a bay biba na Corsou den siglo 17 y na Aruba den siglo 18.