Minister di Finansa, Asunto Economico y Sector Primario, mr. Geoffrey Wever, ta anuncia cu e basismodule digital di Leergang Openbare Financien Aruba (E-LOFA) lo cuminsa oficialmente dia 1 december 2025. E iniciativa ta un parti crucial di e roadmap pa mehora maneho di finansa publico y ta alinea cu e obhetivo di “Programa di Gobernacion AVP-FUTURO 2025-2028” pa profesionalisa e aparato gubernamental.
E-LOFA ta un curso fundamental cu ta introduci e empleado gubernamental na e proceso di presupuesto, maneho administrativo y responsabilidadnan financiero di Gobierno. E material a wordo modernisa y digitalisa pa garantisa acceso constante y pa fortalece conocemento tecnico den forma sostenibel.
E basismodule ta habri pa maximo 100 participante den su prome ronda. Diferente departamento clave por participa, manera Directie Financien, DIMP, DEZHI, CAD, KPA, DVG, DSZ, DRH, DB y otro servicionan cu tin prioridad den e ehecucion di Landspakket, Tema A.
“Pa nos traha riba un gobierno moderno y responsable, nos pilar financiero mester ta forma riba conocemento fuerte, actualisa y accesibel. LOFA digital ta un paso enorme den e direccion ey, y e lo fortalece capacidad tecnico di nos funcionarionan y mi ta gradici Departamento di Finansa cu e tremendo initiativa y trabow importante aki”, Minister Wever a bisa.
E iniciativa digital ta confirma e compromiso di Gobierno di Aruba pa traha riba un aparato estatal mas competente, profesional y prepara pa retonan di futuro den area di maneho financiero.