KRALENDIJK – Djasabra 28 di mart, Kuerpo Polisial Hulanda Karibense (KPCN) ta organisá un Bootcamp di 8 or di mainta pa 10 or di mainta na Stadion di Playa. Pa medio di e aktividat aki, KPCN ta drenta kontakto dirigí ku potensial aspirantenan, duna nan un imágen realístiko di e trabou di polis i enkurashá nan pa solisitá.
Durante e Bootcamp, e partisipantenan ta eksperensiá pa nan mes kiko e profeshon di polis ta enserá. Nan lo hasi ehersisio físiko, traha huntu den tim i aktua den situashonnan práktiko, manera insidente i detenshon. Di e manera aki, nan ta haña un bista direkto tantu riba e eksigensianan físiko komo mental i e trabou den tim ku e trabou ta rekerí.
E Bootcamp di KPCN no ta un momentu di selekshon, pero e ta ofresé oportunidat aksesibel pa sera konosí ku e kuerpo. Ku e bootcamp aki, KPCN ta baha barera i personanan interesá ta haña e chèns di deskubrí pa nan mes si un karera na polis ta pas ku nan.
Partisipashon ta habrí pa tur persona di 17 aña òf mas ku ta sinti nan mes den bon kondishon i ku tin interes den e profeshon di polis. Despues di e aktividat, e partisipantenan tin e oportunidat pa kombersá ku agentenan polisial i por solisitá na e sitio mes ku sosten di e kuerpo.
Ku e aserkamentu aki, KPCN ta skohe konsientemente na un manera aksesibel di rekrutá personal i, den kua no solamente ta informá e personanan interesá, sino ta motivá nan pa dal e siguiente paso.