ORANJESTAD – Lider di Fraccion di MEP Evelyn Wever-Croes durante conferencia di prensa semanal a habri e siman denunciando cu Parlamento ta desfuncional. E ta basa esaki riba diferente ehempel. “Nos tin prueba cu un Minister a sea gaña Parlamento cu e mes a paga pa un jet priva, of a actua contra ley Mericano si e mes a paga di berdad.
Nos a purba di tur forma pa e minister duna cuenta, nos a puntr’e ora e tabata den Parlamento, nos a mande varios pregunta por escrito, nos a pidi reunionnan cune den Parlamento. Nada a duna resultado. E no ta contesta y presidente di Parlamento Marlon Sneek ta scohe pa sconde y proteha e ministernan, enbes di haci su trabou di presidente di Parlamento y para pa defende e instituto di Parlamento. Hasta nos a cuminsa cana e caminda legal a base di ley di LOB, ni asina e minister kier contesta.
Nos ta mira con Gobierno ta sigui ehecuta plan cu ta contra boluntad di un pueblo, y a aproba un biaha mas e ley di reino HOFA. Mas cu 10 mil persona a firma contra e ley di HOFA. Sindicatonan a expresa nan desacuerdo. Gremionan a expresa nan preocupacion. Den Parlamento nos a pidi pa e ministernan bin duna cuenta, pero e presidente di Parlamento un biaha mas ta nenga di yama e reunion, y ta prefera pa protehe y sconde e ministernan, mientras e tantisimo preguntanan cu nos a hasi, ningun ta haya contesta.
Nos a pidi reunion urgente pa trata e tema di economia, prome mirando e desaroyo di Venezuela y con Aruba por probecha pa diversifica su economia, y despues cu e guera entre Iran y Merca a cuminsa, y prijs di azeta ta aumentando drasticamente, nos a bolbe pidi reunion pa sa ki plan di contingencia e gobierno tin pa evita cu esaki ta bai afecta bo cartera. E reunionnan aki tampoco a wordo yama ainda. Sea gobierno no tin un plan of tin miedo pa enfrenta Parlamento.
Ultimo simannan tabata tin ademas, varios reunionnan di diferente comisionnan fiho den Parlamento, e parlamentarionan di coalicion AVP-Futuro no a ni presenta. Nan ta ocupa cu nan estudionan na universidad y otro compromisonan fuera di e compromisonan di atende reunion.
“Mi a manda pidi un reunion cu presidente di parlamento y tur lider di fraccion, cu peticion pa nos reuni urgente pa atende esakinan y e ningun contesta. Esakinan ta ehempelnan apenas di e ultimo dia y simannan. Lamentablemente mester constata cu Parlamento, e cas di pueblo, NO ta funciona pa eherce control riba gobierno y defende interesnan di ciudadanonan.
Tempo cu ami tabata den gobierno, nos gobierno tabata respeta Parlamento. Ministernan tabata bin regularmente den Parlamento, nos tabata atende cu topiconan urgente, mesora. Nos por mira den prensa y riba medionan social cu ministernan ta presente na eventonan social, pero den cas di pueblo, unda cu mester duna cuenta berdadero nan no tey. Y esaki ta algo hopi serio pasobra bo derecho di wordo scucha ta morto, bo derecho di haya informacion ta morto, bo derecho di controla gobierno ta morto.
Ta tempo pa Gobernador hala atencion di e presidente di parlamento y e minister presidente, pasobra Gobernador finalmente ta esun cu mester garantisa nos estado di derecho y exigi respet pa nos Constitucion.
Fraccion di MEP lo expone e desfucionamento aki den henter Reino y lo entrega keho na Parlamento di Union Europeo y Nacionan Uni. Esaki ta e peor Parlamento den 40 anja di existencia di nos pais, hustamente momento cu nos ta celebra 40 anja di existencia di Parlamento. Esaki ta un maart scur pa democracia” Evelyn Wever-Croes a finalisa bisando.