ORANJESTAD | Recientemente a tuma luga na Universidad di Aruba un encuentro special cu a reuni profesionalnan di hoteleria hunto cu studiantenan di hospitalidad y turismo for di Universidad di Aruba. E encuentro tabata enfoca ariba dialogo entre generacionnan den e industria y a marca e inicio di un iniciativa nobo dirigi pa fortalece liderazgo y intercambio di conocimento den e sector.
Durante e sesion aki, Sra. Ivy Correa, experto den industria di hoteleria cu mas di 20 aña di experiencia, a presenta su iniciativa nobo ‘Hospitality Mastery’. E plataforma aki su proposito ta pa crea un comunidad profesional unda lidernan di e industria y talento emergente por reuni pa comparti experiencia, reflexiona riba retonan actual y contribui na idea nobo pa e futuro di servicio y hospitalidad na Aruba.
E iniciativa ta desaroya den colaboracion cu Universidad di Aruba, unda e facultad di ‘Hospitality & Tourism Management’ a selecta un grupo di studiantenan cu ta destaca pa forma parti di e prome cohort. E participacion di e studiantenan ta crea un conexion directo entre e formacion academico y e realidad di e industria, permitiendo cu perspectiva fresco y experiencia practico por encontra otro den un espacio comun.
Segun Correa, e industria di hospitalidad ta evoluciona lihe y continuamente y e dialogo entre generacionnan ta esencial pa mantene Aruba competitivo como destinacion turistico. Un aspecto importante di e programa aki ta pa conecta conocimento di lidernan actual cu e idea y ambicionnan di e proximo generacion di profesionalnan.
Actualmente e comunidad di Hospitality Mastery ta consisti di 32 miembro selecta. E grupo ta inclui 10 studiante di universidad, 10 supervisor, 10 manager y varios director di nivel ehecutivo. E participantenan ta bin for di diferente area di operacion, incluyendo rooms division, food and beverage, housekeeping y learning and development. E proposito ta pa mantene e grupo aki activo durante un aña, creando un proceso continuo di intercambio di conocimiento y reflexion riba desaroyo di e industria.
Un otro aspecto importante di e plataforma ta, cu e ta enfoka ariba aprendizahe y desaroyo di liderazgo. Pa cu esaki, Sra. Noémi Conradus-Tromp, fundador di The Whole Edit, ta participa como strategic partner. Conradus-Tromp lo contribui na e structuracion di e framework di ‘Learning & Development’ di e cohort y lo apoya e crecemento continuo di liderazgo entre e miembronan. Esaki ta un rol clave cu lo forma e componente educacional y di desaroyo di e plataforma.
PRESS RELEASE FOR IMMEDIATE PUBLICATION
Durante e encuentro inicial, Sra. Melanie Kelly di Aruba Tourism Authority a presenta datonan relevante riba e estado actual di e industria turistico. Su presentacion a enfoca riba e importancia di inclui dato y analisis di industria pa guia decisionnan strategico, y riba e necesidad di alinia e operacionnan di tur dia cu e vision corporativo pa 2030.
Pa Correa, e balor mas grandi di e iniciativa lo nace for di e tipo di conversacion cu lo tuma luga entre e participantenan.
Segun Correa, “E trabou real, y e magia real, lo pasa den e combersacionnan profundo y honesto cu nos lidernan y nos talento mester ta dispuesto pa tene hunto. Aruba tin lidernan extraordinario, hende cu a cuminza nan carera for di abou y cu ta compronde e industria completamente. Na mes momento nos tin studiantenan cu mente briyante y visionario cu ta casi grita pa haya un bos den yuda forma loke cu tin cu bin despues.”
E iniciativa a wordo sponsored pa varios partner di industria, incluyendo Ship2Aruba, Arion Wine, H&H Wine y Santa Margarita by Romar Trading, cu ta contribui na crea un espacio di colaboracion, aprendizahe y dialogo pa e futuro di hospitalidad na Aruba. Un gratidud special ta bay pa team di Corvia Solutions, Universidad di Aruba, The Whole Edit, y Aruba Tourism Authority pa e colaboracion.