A tuma lugar durante oranan di mainta riba Diabierna 7 di November 2025, firmamento di un acuerdo collectivo (CAO) nobo pa e afiliadonan di FTA na Divi Phoenix Aruba (Grape Holding N.V.) , cual lo drenta na vigor entrante 1 di Januari 2025 y lo termina dia 31 di December 2027.
Despues di varios negociacion cu a tuma lugar entre Divi Phoenix Aruba y FTA, a logra sera un contrato collectivo den cual miembronan di e empresa hotelero lo conoce varios adelanto. Entre otro; ta inclui un aumento general pa duracion di e acuerdo, y varios ahuste den beneficionan secundario.
Pa e ocasion aki e CAO a wordo firma di parti Divi Phoenix Aruba , General Manager; Pearl Lake, Director di Finansa: Valerie Peterson. Di parti FTA, Presidente: Hose (Jomar) Figaroa y Vice Presidente: Aldrick Pontilius.
Como testigo tawata presente durante e ceremonia pa firma e acuerdo collectivo, representando Divi Phoenix Aruba , Director di Recurso Humano: Maria Esguerra, Director di Training di Recurso Humano: Andy Farro, Manager di Recurso Humano Divi Phoenix: Jureen Vrolijk. Den representacion di FTA tawata presente, Negociador Principal: Ryan Giel.
Tawata un ocasion ameno na cual tanto Gerencia di Divi Phoenix Aruba y FTA a expresa nan satisfacion di por a logra sera un acuerdo collectivo pa e afiliadonan na e respectivo hotel pa e tres añanan venidero, ademas di e relacion di hopi aña cu tin entre e empresa hotelero cu e sindicato.
FTA ta gradici e afiliadonan di Divi Phoenix Aruba pa brinda e confianza, pa por atende cu nan asuntonan laboral.
Nos ta presenta un resumen di foto, di e momento cu a tuma lugar firmamento di e acuerdo collectivo.