ORANJESTAD – Cu un record impecabel di accion den Parlamento, Fraccion di MEP ta demostra cu nan rol di control no ta keda den palabra so. Den e cuadro di integridad y bon gobernacion, e fraccion awor ta considerando e instrumento di control mas fuerte cu ley ta brinda: un Encuesta Parlamentario pa yega na e berdad den e caso di Minister Gerlien Croes.
Diaranson ultimo, Parlamento a trata un ley di iniciativa di e parlamentarionan Edgard Vrolijk y Rocco Tjon. Cu esaki, Vrolijk ta marca su di 9 ley di iniciativa y Tjon su di 5. E cifranan aki ta papia pa nan mes: MEP ta tuma su responsabilidad cu e comunidad hopi serio, dunando contenido real na e derecho di iniciativa (initiatiefrecht).
Integridad ta e fundeshi
Pa e Fraccion di MEP, integridad no ta un concepto bashi, sino e fundeshi di confiansa entre un gobernante y su pueblo. Ora un Minister ta wordo cuestiona riba su actonan, manera e biahe den un jet priva, e unico contesta aceptabel ta e berdad absoluto y transparente.
Lider di Fraccion, Evelyn Wever-Croes, a splica cu MEP ta cla pa e siguiente paso den nomber di e bienestar di Aruba. “Nos ta considerando seriamente pa inicia un Encuesta Parlamentario. Esaki ta un instrumento fuerte di control pasobra pueblo tin e derecho sagrado di sa kico ta e berdad. Te awe, Minister Gerlien Croes no a duna un contesta cla ni transparente. Ora un Minister faya den su deber di duna cuenta, Parlamento mester actua pa restaura e respet pa nos institucionnan.”
Honestidad sin condicion
E meta di MEP ta cla: claridad total. Den un democracia saludabel, transparencia no ta un fabor cu un Minister ta haci, sino un obligacion legal y moral.
“Nos lo uza tur medio legal na nos alcanse pa haya e berdad. Pueblo di Aruba ta merece gobernantenan cu ta actua cu honestidad y cu no ta sconde tras di tecnicalismo. Transparencia no ta un opcion, e ta nos deber principal pa cu e pueblo cu nos ta sirbi,” Evelyn Wever-Croes a finalisa bisando.