1
Dia 22 di april, riba Earth Day (Dia Internacional di Tera), Prome Minister mr. Mike Eman hunto cu Aruba Conservation Foundation, Directie Natuur en Milieu (DNM), y boluntarionan dedica di Fundacion Ban Lanta y Planta, a duna inicio na un proyecto di gran importancia: reforestacion di Spaans Lagoen cu matanan nativo.
Durante e actividad, Prome Minister Eman a planta simbolicamente e prome mata di Mangel Blanco na Spaans Lagoen, unda cu e awa di lagoen por yega y sostene e bida natural di e area. Boluntarionan dedica tambe a planta un cantidad di Mangel Blanco na luganan strategico pa yuda e vegetacion bolbe y florece den su habitat natural.
Na otro banda di caminda, Prome Minister a planta e prome mata di Fofoti, un otro simbolo natural di nos isla, den un area dedica pa esei, como parti di e esfuerso pa amplia e impacto positivo riba nos ambiente.
Segun Sr. Tyson Lopez, Director di Aruba Conservation Foundation, e proyecto ta parte di un plan mas amplio di restauracion ecologico pa Spaans Lagoen, un zona vital pa biodiversidad. Durante hopi aña, e saliña a sufri degradacion pa motibo di acumulacion di tera y falta di circulacion di awa, locual a afecta e mangrovenan. Cu e iniciativa aki, kier trece e Mangel Blanco bek na e sitio aki.
Anita Aarts, directora di Fundacion Ban Lanta y Planta, a duna claridad riba e proceso cu e fundacion ta sigui pa crea y traslada mangrovenan for di simiya te na e sitionan apunta. Ademas a enfatisa e rol esencial di mangrovenan blanco den proteccion di e ecosistema di Aruba.
Na su turno, Prome Minister Eman a pone enfasis riba e necesidad urgente pa logra un balans entre desaroyo y proteccion di naturalesa. Aruba a perde mas cu 70% di su vegetacion nativo durante e ultimo decadanan. Urbanisacion, construccion y infrastructura a causa e perdida aki pero awo a yega un punto crucial pa restaura nos areanan di naturalesa.
E proyecto cu a lansa awe ta sigui ehempel di esnan cu ya a cuminsa na Noord, na unda Fundacion Ban Lanta y Planta ta plantando un cantidad di mata riba e area conoci como Bucuti Nature Reserve di Ewald Biemans.
Gobierno di Aruba, a traves di e Ministerio di Naturalesa, ta compromete pa sigui planta matanan nativo, incluyendo matanan di fruta y otro especie esencial. E meta ta pa e esfuerso aki sirbi como inspiracion pa comunidad, pa por haci su parte y pasa e consciencia ambiental na e siguiente generacion.