Hunto cu DOW, Gobierno di Aruba ta trahando un trapi na Mabon pa facilita acceso na nos grandinan den bario cual pronto lo keda completa. Apenas luna pasa, durante di e Accion di Bario a bishita e bario di Mabon y a pone man na obra!
Durante accion di limpiesa na Mabon Complex, e habitantenan a acerca Prome Minister mr. Mike Eman cu nan preocupacionnan pero tambe un posibel solucion pa e retonan cu nan ta enfrenta den nan bario. Entre otro e pasada y tambe un area cu a bira un mini dump, caminda tabata acumula sushi.
Prome Minister Eman a acerca e departamento concerni, cual ta DOW, pa asina hunto yega na un solucion pa e incomodidad diario cu e habitantenan ta pasa aden. Mesora nan a presenta y brinda un opcion pa soluciona e pasada den Mabon Complex.
A opta pa un trapi, traha di palo duradero, hancho den forma di plataforma. E habitantenan tambe a sugeri algo cu por tin step nan hancho y largo pa esnan di mas edad por baha sin dificultad. E idea nan a tume cu man habri. Tambe mester menciona cu a cera e mini dump cu piedra ful rond di dje, asina evita cu por tira sushi riba e pida tereno habri ey den futuro.
Palabra di felicitacion a bay na tur trahado di DOW cu a realisa e tremendo trabou cu e proyecto y cu pronto lo instala iluminacion di e area, cu ta un pasada hopi frecuenta pa e habitantenan. Ta mira riba e importancia di cumpli cu locual ta proyecto grandi, pero tambe e cosnan chikito cu ta haci un diferencia hopi grandi pa e comunidad.
Di parti DOW a indica cu e trabou ta na un 90% cla, ta den espera di e ultimo materialnan cu mester yega den careda di otro siman, pa asina finalisa locual ta e ultimo stepnan di e trapi.
Habitantenan cu for di comiensa a boga pa e adaptacion aki, cual nan ta sumamente contento y gradici na Gobierno y Premier Eman cu e esfuerso haci. E atencion na adulto mayor cu ta gran mayoria di esnan cu ta haci uzo di e pasada aki, cu hopi biaha ta masha dificil pa subi of baha e subida aki. Semper cu e miedo di caida y peliger na momento di yobida.