Ku e marchanan di karnaval ku ta aserkando i pa garantisá seguridat durante kada aktividat, Kuerpo Polisial Hulanda Karibense(KPCN) ta para ketu na e reglanan vigente i e mantenshon di órden públiko durante di e temporada di fiesta i alegria.
Tráfiko
Ta importante pa paga bon tinu i ta alerta riba kaminda pa bo mes seguridat i seguridat di otronan.
Bisti faha di seguridat, no atendé ku telefòn miéntras ta stür, no konsumí alkohòl ora ku ta stür, bisti un hèlm adekuá si bo ta manehá kualke vehíkulo di dos wil i mantené e velosidat máksimo permití.
No habri barikada i tampoko stashoná bo outo tras di barikada. Esaki por tin komo konsekuensia ku e kaya no ta aksesibel den kaso di emergensia.
Stashoná bo outo na un lugá seif i no laga kos balioso den outo.
E organisadó di karnaval ta responsabel pa sera kaya ku barikada i habri esaki bèk konforme su pèrmit. Ta sera kaya 1 ora promé ku marcha sali.
Durante marchanan
Skohe pa kùp re-usabel òf beker pa prevení situashonnan peligroso i no kana ku glas òf bòter.
Hóbennan, palabrá ku bo mayor(nan) unda bo ta òf unda bo ta bai. Evitá uso di alkohòl i droga. Sòru pa bon protekshon kontra di solo i bebe sufisiente awa.
Paga bon tinu riba bo yu(nan), uza dòpi di orea pa nan i siña nan ken por yuda nan i kiko nan mester bisa na momentu ku nan pèrdè.
Si bo ta bai konsumí alkohòl, no hasi mal uzo di esaki i traha palabrashon ku un persona ku por hiba bo kas di manera seif; no stür bo mes.
No ta permití baiskel, vehíkulonan di motor di dos wil ni stèp riba e ruta di karnaval na momentu ku esaki ta será.
No lo tolerá bringamentu i niun tipo di arma òf droga. Si ta nesesario polis lo listra i hasi kòntròlnan riba persona i vehíkulonan ku ta move den e área di marchanan di karnaval.
Despues di kada marcha, na momentu ku habri kaya, no ta permití muzik duru na ningun sitio riba e ruta di karnaval ni aglomerashon di hende riba karetera ku ta stroba pasada di tráfiko.
Mirando e periodo largu ku bo ta for di kas, ta rekomendabel pa sera bo kas bon i sòru pa esaki tin sufisiente iluminashon ora bo sali.
Gruponan di karnaval
Gruponan ku ta partisipá den marcha mester tei 1 ora i mei adelantá ku nan vehíkulonan, esta promé ku e orario di salida pa kòntròlnan nesesario.
Polis ta kontrolá riba shofùrnan ku tin un reibeweis bálido basá riba e vehíkulo ku bo ta manehá, seguro bálido i lo hasi un tèst riba uzo di alkohòl na komienso i durante di marcha.
Ta preferibel pa kada vehíkulo tin dos shofùr.
No laga ningun persona sinta riba e rant di baki di pikòp òf trùk durante marcha.
Si gruponan ta na ora, marcha lo sali na ora pa kada partisipante por gosa durante e orario stipulá.
KPCN ta bon prepará i lo tin sufisiente agente polisial tantu na pia, den outo, riba baiskel i riba skuter i lo intensivá e kòntròl na sitionan stratégiko i ku ta hopi bishitá. Polis lo aktua di manera estrikto kontra personanan ku ta forma molèster pa otro i ku no ta sigui òrdu di outoridat.
Laga nos kada un mantené nos mes na kada regla di seguridat, gosa sanamente i duna oido na òrdu di polis pa asina nos por selebrá karnaval 50 na un manera responsabel i seif.
Kuerpo Polisial Hulanda Karibense ta deseá un i tur un temporada di karnaval plasentero.