Club di DAM Arowak a lansa un proyecto educativo nobo pa trese e wega di mesa, dam na tur scol basico na Aruba. E iniciativa ta dirigi na mucha di derde te cu vijfde klas, cu e meta pa stimula pensa logico, concentracion y pasenshi na un manera divertido. E projecto a ser haci posibel danki na sponsor generoso, cual a haci posibel na tur school sin ningun costo pa nan.
Cada klas participante lo ricibi un set di DAM gratis y un boeki di regla facil pa comprende. E boeki di regla ta introduci e mascota DAM-O-SAURUS cu ta splica e reglanan den un manera ameno y educativo mientras cu e ta promove e valornan manera entro otro pensa critico, planea, respet pa regla y disiplina. Ademas di e boeki di regla di DAM Club di Arowak a laga traha un video cu ta splica e reglanan di e boeki. Tur hende por download e video.
“DAM no ta solamente un wega, e ta stimula pa pensa critico, planifica y respeta regla,” Ricardo Wever, Presidente di Club di DAM Arowak Aruba a comenta. “Nos ta kere cu introduci DAM na scol lo yuda muchanan crece intelectualmente y emocionalmente.” Na Hulanda a haci investigacion cual resultado ta indica cu mucha cu ta ricibi les y hunga deporte mental (dam y/of schaak) ta logra miho resultado den examen final nan. Esaki door cu e tipo di deporte mental aki ta stimula pensa analitico y ta yuda desaroya un nivel haltu di concentracion y enfoke.
Como parti di e programa di desaroyo juvenil, Club di dam a comparti cu e hungador campeon juvenil, Henry Lacle, anja pasa a representa Aruba na Polania. Tabata un experiencia inolvidabel pe. Pa 2026 e Campeonato Internacional di Juventud lo tuma lugar na China. Club di DAM Arowak ta trahando duro pa wak si por manda e campeon juvenil di 2026 di Aruba pa participa y representa Aruba riba e escenario mundial.
Lesnan di DAM ta tuma lugar tur Dialuna di 5:00 pa 6:00 anochi na Sun Plaza, Local 401-L, y ta pidi un contribucion chikito di Fls. 5.00 pa luna. Pa inscribi, por tuma contacto cu Mario Jansen na 699-8245.
