Durante mas di 28 aña, Champagne Carnival Group a sirbi como un piedra fundamental den carnaval di Aruba, orguyosamente representando e cultura y tradicion nan vibrante di nos isla. Como un di e gruponan cu mas aña di existencia y alabes mas grandi, nos ta dedica na duna bida na e spirito di carnaval cu disfrasnan elabora, energia contagioso y un pasion profundo pa baile y musica. Cada aña, nos ta sali riba caya, no solamente como participante, sino como embahador di e herencia cultural di Aruba.
Na cabes di nos grupo ta Lienchie, cu incansablemente ta sigura cu nos participacion ta nada menos cu espectacular. Su compromiso firme cu excelencia y preservacion cultural ta mantene nos grupo briyando tur aña, personificando e union, alegria y orguyo cu ta defini Carnaval di Aruba.
Carnaval di Aruba ta celebrando su di 72 Aniversario!
E tema e aña aki di Champagne Carnival Group ta The Grand Big Top. A scoge color cora (cora riba cora) pa nos massa, paso e color cora ta e color mas iconico y mas usa den un circo. For di e tent di e circo te na e cortina di e circo cu ta duna e señal cu e show di circo a cuminsa. Cora ta presenta anticipacion, emocion y tambe color cora ta pa advertibo cu algo fuera de lo normal ta bay pasa.
Mayoria di biaha nos tin algun tema den mente y ta busca muestranan di tela. A base di e muestranan di tela aki nos ta scohe e tela cu mas nos ta gusta y a base di esaki ta scohe e tema. Tur aña nos team mes ta busca diferente ideanan di modelo. Nos ta consulta esaki cu un disenador, cual tambe ta pone su ideanan y pa despues haci esaki visualmente pa nos den forma di un diseño. E aña aki e disenador di nos massa tabata Andrew Curiel.
Nos grupo ta conoci pa e grupo cu a start cu e tendencia cu tur sapato mester ta color cu nos ta indica p.e. e aña aki a scohe pa color cora. Nos semper tin nos modelonan cla decora pa tur persona por pasa wak na cede pa por haya idea di con pa decora nan paña. Tambe nos ta bin cu diferente afspraak tocante ki color por usa pa decora, kico ta cambionan cu no mag haci den e disfras etc. Nos ta kere cu esakinan ta algun di e motibonan cu hopi biaha nos massa ta hala atencion. Nos por bisa cu nos participantenan ta gusta competi entre nan mes ken ta decora mas diferente, mas hopi, mas luhoso y/of mas bunita. P’esey nos kier a gradici nos participantenan cu semper ta haci todo lo posibel pa laga nan mes y nos grupo luci espectacular tur aña.
Nos di Champagne kier a gradici na prome lugar nos crew, cual ta duna nos participantenan un servicio di VIP, full e team di mantencion, team di social media, modelonan, costureranan, team cu ta yuda na cede, nos fotografo, security, voluntarionan, companianan di decoracion, diseñadornan, team di headpiece, elite y tur persona cu di un of otro forma ta yuda Champagne subi caya y brinda un espectaculo tur aña.
Tambe nos kier a gradici SMAC cu sigur tin un tarea hopi dificil pa dirigi nos carnaval, polis y rode kruis y tur otro instancianan cu ta haci carnaval posibel.
Naturalmente nos kier a gradici Tsunami, cual ta un parti clave den Champagne. Tur aña Tsunami ta solido y nos ta hopi orguyoso di nos banda cu ta subi caya cu e meta pa tur hende gosa henter parada.
Y por ultimo nos kier a gradici nos sponsornan cu ta: Bright Bakery, Bohama Aruba, Balashi, Setar, Bateria Energizer y Aruba Bank. Y prepara paso durante Carnaval 73 Champagne ta bay subi caya cu AURA: energia positivo!