0
Notisia di polis di djaluna 9 di mart te ku djárason 11 di mart 2026
Notifikashon di kandela den besindario di Punta Blanku
Djamars 10 di mart, alrededor di 3.10 or di atardi, ‘meldkamer’ sentral a risibí notifikashon tokante desaroyo di huma den besindario di Punta Blanku.
Polis a bai na e sitio i a konstatá ku tabatin huma tabata sali for di un fábrika, prosedente di un instalashon di koriente. Brantwer a hasi investigashon na e sitio i a resultá ku un kabel entre e panélnan solar i e baterianan a pega kandela. A deskonektá koriente i despues a paga e kandela.
Aksidente entre outo i fatbike
Djamars 10 di mart, alrededor di 8 or di mainta, polis a risibí notifikashon tokante un aksidente ku herido na altura di Kaya Nikiboko Sùit i Kaya Lisboa. Na e sitio a resultá ku un fatbike a dal den un outo na momentu ku e outo a lora pa drenta Kaya Lisboa. E shofùr di e fatbike, un ménor di edat a resultá heridá i ambulans a transport’é pa hòspital pa tratamentu médiko. A hasi un tèst di supla ku e shofùr di e outo pero no tabatin indikashon di uso di alkohòl.
Kòntròl di tráfiko
Den oranan di anochi di djaluna 9 di mart, aspirantenan di KPCN a tene un kòntròl di tráfiko na Kaya Amsterdam. Durante e kòntròl a kontrolá un total di shete vehíkulo, di kua seis outo i un skuter. A duna un shofùr but pa manehá sin reibeweis bálido.
Bròmer konfiská
Djaluna 9 di mart, alrededor di 10’or di mainta, polis a tuma nota di un bromer riba Kaya Tintorero. Ta konosí pa polis ku e shofùr no ta disponé di un reibeweis. A para e shofùr pa un kòntròl i e no por a mustra un reibeweis. A dun’é but pa esaki. Pa motibu ku tabata e di tres biaha ku e shofùr a haña but pa kore sin reibeweis, a konfiská e bròmer. A transportá e vehíkulo pa warda di polis.