Den ultimo lunanan Aruba a mira un aumento alarmante den casonan di suicidio y intento di suicidio. Den un pais chikito manera nos, cada bida cu bay perdi ta pisa duro riba familia, bario y comunidad. Pero ora cifra nan cuminsa mustra un patron, no por trata esaki como incidente separa, esaki ta un señal di algo mas profundo cu ta pasa den nos sociedad.
Segun datonan reciente, porcentahe di hende cu algun biaha den nan bida a intenta suicidio ta significativo, y entre hoben adulto e cifra ta aun mas halto. Esaki ta mustra cu nos no ta papia solamente di caso individual, pero di un reto colectivo cu mester un contesta urgente y coordina.
Nos pais ta enfrenta varios presionan na mes tempo, costo di bida cu ta subi, obesidad y problema di salud cronico, consumo halto di alcohol, tension social, inseguridad economico, criminalidad y un sentimiento general di desanimo entre hopi hende. Tur esakinan por ta factor cu ta contribui na un estado mental fragil den parti di nos poblacion.
Lo mas preocupante ta cu, te awor, no ta mira ni tende claramente cu tin un plan di crisis estructural presenta pa maneha e situacion aki riba corto plaso. Comunidad ta sinti incertidumbre. Famia nan ta sinti nan ta so. Profesionalnan den e campo ta traha cu limitacion. Y pueblo ta puntra, unda ta e direccion, unda ta e coordinacion, unda ta e plan concreto?
Un crisis di salud mental no ta resolvi cu declaracion y potret bunita so. E mester:
* Un plan di accion inmediato cu meta cla y fecha defini
* Refuerzo di servicio di atencion psicologico y psiquiatrico
* Campañanan di concientisacion serio y sostenibel
* Apoyo directo na scol, trabou y comunidad
* Datos transparente pa pueblo por compronde magnitud real di e problema
Nos no por sigui reacciona solamente despues di cada tragedia. Nos mester preveni. Nos mester anticipa. Nos mester proteha.
Salud mental no ta un luho. No ta un tema secundario. Ta base di un sociedad sano. Ora desesperacion bira silencio colectivo, riesgo ta crece. Aruba mester liderasgo firme cu ta reconoce gravedad di e momento y cu ta pone accion riba palabra.
Cada cifra ta representa un persona. Un mama. Un tata. Un yiu. Un amigo.
Y cada dia cu pasa sin un plan cla, ta un oportunidad perdi pa salba un bida.