Aruba Airport Authority N.V. (AAA) ta destaca e trabounan andando dentro di e proyecto transformativo Gateway 2030, cu e avance di e trabounan di Fase 1B. E logro nobo aki ta representa un stap significativo pa redefini e experiencia di biahe na Aeropuerto Internacional Reina Beatrix (AUA), garantisando cu Aruba ta keda un destinacion di clase mundial construi pa e biahero di awendia y cla pa e necesidadnan di mañan.
Construyendo e futuro di Aeropuerto di Aruba
Gateway 2030 ta un proyecto di transformacion di aeropuerto di varios aña diseña pa expande, modernisa y eleva e porta principal di Aruba. E enfoke di Gateway 2030 ta pa crea un experiencia di biahe sin problema y agradabel pa cada pasahero.
Cu e finalisacion di Fase 1A den luna di april 2025, e biaheronan awo ta disfruta di un terminal di check-in pa Merca cu ta espacioso y tecnologicamente avansa, diseña pa eficiencia y sostenibilidad. Respalda pa un sistema di “baggage handling” di ultimo generacion capaz di procesa te cu 2.000 maleta pa ora.
Fase 1B: Ampliando capacidad y comodidad
Cu e inicio di Fase 1B, e pasaheronan y partnernan lo cuminsa mira e aeropuerto expande mas ainda. E fase nobo aki ta enfoca riba mehora e experiencia di salida a traves di:
Tres gate nobo ekipa cu tres “boarding bridges”
Tres “bus gates” nobo
Sala di espera expandi pa mas comodidad y capacidad
Mehoracion di fluho operacional y circulacion di pasahero
E expansion ta cuminsa na Gate 8 (Edificio D), caminda construccion ta avansando rapidamente. Pronto un “connecting bridge” lo conecta edificio D cu edificio E, cu lo contene tres gate nobo. Ya caba ta lantando y bashando muraya, cu un structura nobo di hero; señalnan visibel di e evolucion di e aeropuerto.
CEO interino, James Fazio a enfatisa e importancia di e siguiente fase aki den e vision a largo plaso di e aeropuerto: “Fase 1B ta refleha nos compromiso pa entrega un experiencia di aeropuerto cu ta ofrece un standard di clase mundial mientras ta brasa e hospitalidad cu ta describi Aruba. Cada stap cu nos tuma bou di Gateway 2030 ta diseña pa mehora comodidad, eficiencia y e experiencia en general di nos pasaheronan. Nos ta gradici e pasenshi y e sosten di nos comunidad mientras cu nos ta sigui construi un aeropuerto cu tur Rubiano por ta orguyoso di dje.”
Preparacion pa Fase 2 ta andando caba y ta programa pa cuminsa mesora despues di e finalisacion di Fase 1B. Fase 2 lo inclui:
Un sala di check-in pa vuelonan cu ta bayendo pa Merca y pa e vuelonan cu no ta Mericano.
Area nobo pa Migracion, Security y U.S. Customs and Border Protection (USCBP)
Un area comercial y plasa di cuminda y bebida nobo
AAA ta gradici tur biahero, trahado y partner pa e pashenshi continuo y e sosten durante e expansion importante aki. Cu e innovacion, eficiencia y hospitalidad como pilarnan fundamental, Aeropuerto di Aruba ta mantene su compromiso di mehora e experiencia den aeropuerto y di sigui ta Aruba su porta pa felicidad.
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 24 diferente aerolinea operando na Aruba contribuyendo na mas cu 3.2 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 75% ta di Merca y Canada, 17% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.