Parlamentario Eduard Pieters a bishita Santa Rosa, e centro di agricultura, ganaderia y pesca di Aruba, pa haya un mihor panorama con e departamento aki ta maneha su responsabilidad fundamental brindando sosten na nos cunukeronan y seguridad alimentario. Santa Rosa no ta solamente un tereno pa cultiva; ta un hub strategico pa agricultura, ganaderia, pesca y desaroyo sostenibel, cu implicacion social y politico profundo.
Un rol fundamental basa riba agricultura y ganaderia
Santa Rosa, e Directorado di Landbouw, Veeteelt y Visserij (DLVV), ta responsabel pa apoya y desaroya e sector di agricultura, ganaderia y pesca, cu ta forma parti di e esfuerso pa logra ‘food security’ y poco poco bira menos dependiente di importacion.
Durante su bishita, Pieters a expresa su gratitud pa directora y su ekipo, pa nan apertura y transparencia pa parti informacion detaya riba e plantacionnan, criansa di bestia y metodologia di maneho actual. “E ta un departamento hopi importante pa nos cunukeronan y no por wordo neglisha, pasobra tin un balor economico, social y cultural significativo den nos comunidad,” Eduard a enfatisa.
Proyecto ambicioso pa alimentacion local y desaroyo economico
Santa Rosa ta promove iniciativa cu ta mas largo cu djis un cultivo basico. Santa Rosa ta duna
apoyo pa agricultura local y ganaderia pa aumenta produccion y calidad, ta percura pa renovacion y construccion di infrastructura riba e piernan rond di Aruba pa facilita transporte y maneho di producto local. Tambe tin un proyecto moderno relaciona cu dragon fruit y otro cultivo, cu por stimula economia local y diversifica produccion.
Tin un MoU, cu ta pa mehora calidad di criaderia di bestia den Aruba, cu por yuda pa eleva produccion y rendemento di bestia local.
Desaroyo sostentibel: Innovacion y futuro di agricultura
Un elemento cu Pieters a nota ta e importancia di Agri Innovation Park Aruba, un proyecto cu ta den proceso di diseño tecnico y evaluacion economico pa produccion local y uzo di tecnologia moderno den agricultura y ganaderia. “E Agri Innovation Park (AIP) ta un iniciativa strategico cu mester integra tecnologia moderno den agricultura, crea un ambiente pa siña y fomenta resilencia den sistema alimentario di Aruba. Ta un paso crucial pa enfrenta desafio mundial di food security y vunerabilidad economico, cu ta afecta e islanan chikito manera Aruba”. Sinembargo PPA semper a cuestiona e forma con a ehecuta AIP te awo. Di otro banda gobierno via Santa Rosa mester por brinda mas ayudo na agricultornan local pa e herencia aki no bay perdi.
Impacto social y cultural
E bishita na Santa Rosa no ta solamente tecnico, sino tambe cultural. Aruba tin un tradicion agricola profundo, unda proyecto di plantacion, crianza y mercado di agricultura por sirbi como un motor pa preserva e practicanan tradicional di nos cunucu.
Segun Eduard: “Aruba mester explora posibilidad di un sistema di preservacion y distribucion di simia local y forma di planta tradicional pa fortalece produccion interno y protega biodiversidad.”
Aruba mester inverti
Pieters ta gradici Santa Rosa pa su esfuerzo, pero tambe ta señala cu gobierno mester subi su compromiso na nivel mas alto. “Aruba no por trata agricultura y ganaderia como un complemento, nos mester trata esaki como parti strategico di nos seguridad alimentario, economia diversificacion y resiliencia. Gobierno mester: fortalece financiamiento y sosten pa agricultura y ganaderia y promove colaboracion entre sector publico y priva pa genera empleo, educacion y desaroyo sostenibel”.
PPA ta haci un yamada pa Gobierno actua cu direccion, responsabilidad y vision futurista. Aruba tin materia prima, talento y necesidad, loke cu nos falta ta boluntad politico pa comberti potencial den realidad.