128
Diahuebs 5 di maart, Mike Eman a continua cu su iniciativa di Accion den Bario, un actividad cu ta tuma lugar tur diahuebs cu e meta di mantene contacto directo cu comunidad y tende e preocupacionnan di ciudadano.
E bishita di awe a cuminsa na Tanki Leendert 194-B, na cas di e scol “Mi Preti Wowo”, un institucion cu pa mas cu 30 aña ta brinda servicio na comunidad. Durante e bishita a tuma lugar un momento especial caminda tur presente a canta Happy Birthday pa wela Felicia Koolman, kende a cumpli 93 aña riba 18 di september. Aunke su cumpleaño a pasa caba, Prome Minister Mike Eman no a keda sin celebra e momento aki hunto cu su famia. Durante e celebracion a comparti bolo y a hisa bandera di Aruba na e scol. Tambe su yiu, Giana Koolman, a participa hunto cu Prome Minister den e momento especial.
Den mesun locacion, como parti di e programa di reforestacion, representante Nadine y Francielle a organiza un actividad di plantacion di mata hunto cu e muchanan, stimulando conciencia ambiental entre e generacion mas chikito.
Bishita na Paraguana
Despues di e prome parada, e delegacion a sigui rumbo pa Paraguana 3-C, caminda a haci un bishita na cas di Junior Arends. Durante e bishita, Arends a presenta un demostracion di su scol di musica, tocando algun piesa musical pa e presente nan. Junior Arends ta duna les di musica desde 2013 y actualmente ta guia cerca 70 mucha cada siman, promoviendo talento musical entre hobennan di comunidad.
Pa loke ta e Proyecto di Brass Band, Prome Minister Mike Eman a haci bishita na e cas di e Tanta di Elizabeth Quanipa. Durante e bishita, Roderick y John a presenta nan idea y proyecto pa forma un Brass Band, cu lo busca estimula talento musical y crea oportunidad pa hobennan den e bario.
Accion den Bario ta parti di e vision di Prome Minister Mike Eman pa mantene gobierno cerca di pueblo, bishitando diferente bario pa tende directamente e comunidad y mira con gobierno por sostene iniciativa positivo den cada districto.
Cu bishitanan manera esaki, gobierno ta sigui traha pa fortalece comunidad, estimula talento local y promove actividadnan social y cultural den tur skina di Aruba.
Durante Accion den Bario, diferente departamento di gobierno ta participa activamente pa atende e necesidadnan cu ta surgi den e comunidad. Entre e partnernan cu regularmente ta acompaña e bishitanan tin Serlimar, City Inspector, (DOW) y otro servicio publico relevante. E departamento nan aki ta encarga di evalua situacionnan den e bario, incluyendo recogemento di sushi, desperdicio voluminoso, mata grandi y otro materialnan cu por afecta e limpiesa y seguridad di e vecindario. Durante e bishitanan, ciudadano tambe tin oportunidad pa reporta problema nan directamente, asina cu e departamento nan por tuma accion rapido.
E colaboracion aki ta forma un parti importante di Accion den Bario, pasobra e ta permiti cu solucion practico por wordo implementa mesora, mientras gobierno ta mantene contacto directo cu e comunidad.
Durante e bishitanan den bario, ta notabel cu hopi ciudadano ta aprecia e contacto directo cu Prome Minister Mike Eman. Specialmente hopi pensionadonan cu e delegacion a topa durante e recorrido a expresa nan gradicimento pa e aumento di pension cu recientemente a wordo implementa. Segun nan mes palabra, e aumento aki ta brinda nan un poco mas alivio den nan bida diario.
Hopi di nan tambe a gradici Prome Minister Mike Eman pa e atencion y apoyo cu e ta sigui brinda na comunidadnan, y pa e iniciativa di bishita e barionan regularmente pa tende directamente e necesidadnan di pueblo.